####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00538
Uniform title: muṇḍamālātantram 2
Editor : rasika mohana caṭṭopādhyāya

Description: 
This tantra is a different text from muṇḍamālātantra I, though they coincide in their contents and concerns and belong to the same period. A fairly late tantra.


Notes: 
Data-entered by the staff of Muktabodha under the supervision of Mark S.G. Dyczkowski.

Revision 0: Sept. 19, 2021

Publisher : 
Publication year : 
Publication city : Calcutta
Publication country : India
####################################################




|| ओं नमः शिवाय ||

सर्वानन्दमयीं विद्यां सर्वाम्नायैर्नमस्कृताम् |

सर्वसिद्धिप्रदां देवीं नमामि परमेश्वरीम् || १ ||


श्रीदेवी उवाच


देवदेव महादेव  परमानन्दसुन्दर |

प्रसीद गुह्यवक्त्रान्त कथयस्व प्रियंवद  || २ ||

सर्वतन्त्रेषु मन्त्रेषु गुप्तं यत् पञ्चवक्त्रतः |

तत् प्रकाशय गुह्याख्यं यच्च त्वं मम वल्लभ  || ३ ||


श्रीशिव उवाच


कथान्ते कथयिष्यामि गुप्त्ं यच्चञ्चलाम्बिके  |

स्त्रीस्वभावान्महत्तत्त्व न जानासि शुभप्रदम् || ४ ||


श्रीदेवी उवाच


सुस्थिराऽहं भविष्यामि न वक्तव्यं कदाचन |

तव भक्त्या भविष्यामि भावना मन्त्रसिद्धिदा || ५ ||


श्रीशिव उवाच


देवतागुरुमन्त्राणां एकभावनमुच्यते |

मन्त्रो यो गुरुरेवासौ यो गुरुः सा च देवता || ६ ||

काली तारा महाविद्या षोडशी भुवनेश्वरी |

भैरवी छिन्नमस्ता च विद्या धूमावती तथा || ७ ||

बगलामुखी सिद्धविद्या मातङ्गी कमलात्मिका |

एता दश महाविद्याः सिद्धविद्याः प्रकीर्तिताः || ८ ||

अत्यन्तदुर्लभं लोके षडाम्नायनमस्कृताः |

एताश्च परमा विद्यास्त्रिषु लोकेषु दुर्लभाः || ९ ||

सुखदा मोक्षदा विद्या क्लेशसाध्या न तादृशी |

येन येन प्रकारेण सिद्धिर्यास्यति भूतले || १० ||

सर्वं ते कथयिष्यामि प्रेमभावेन केवलम् |

नैव सिद्धाद्यपेक्षाऽस्ति नक्षत्रादिविचारणा || ११ ||

कालादिशोधनं नास्ति नास्ति मित्रादिदूषणम् |

सिद्धविद्या महाविद्या युगसेवा परिश्रमम् || १२ ||

नास्ति किञ्चिन्महादेवि  दुःखसाध्यं कदाचन |

या काली परमा विद्या [ सैव तारा प्रक्रीर्तिता || १३ ||

या तारापरमा विद्या चतुर्धा कथिता पुरा |

एतयोर्भेदभावेन (सर्वे) नानामन्त्रा भवन्ति हि || १४ ||

उक्तं च कालिकाकल्पे ताराकल्पे च ते मया |

षोडशी या महाविद्या चतुर्धा कथिता पुरा || १५ ||

लक्ष्मीबीजादिभेदेन पञ्चमी सा भवेदिह |

एकाक्षरी महाविद्या बीजहीना भवेत् पुरा ||

भुवनेश्वरी त्र्यक्षरी तु महाविद्या प्रकीर्तिता || १६ ||


श्रीदेवी उवाच


दुष्टा विद्या च देवेश  कथिता न प्रकाशिता |

इदानीं तद्दयाभावात् कथयाङन्दसुन्दर  || १७ ||


श्री-ईश्वर उवाच


भुवनेशी महाविद्या देवराजेन वै पुरा |

आराधिता च विद्येयं वज्रेण नाम मोहिता || १८ ||

एकाक्षरी बीजहीना वाग्भवेनोज्ज्वला भवेत् |

कामराजाख्यविद्या या विद्या सा पुष्पधन्वना || १९ ||

स्मरेण पूजिता पूर्वं भुवनेश्या प्रतिष्ठिता |

कुमारी या च विद्येयं तया शप्ता बहिश्च्युता || २० ||

केवलं शक्तिरूपेण शिवरूपेण केवलम् |

तया प्रतिष्ठिता विद्या तारा चन्द्रस्वरूपिणी || २१ ||

[भैरवी तु महाविद्या महासम्पत्प्रदायिनी |

छिन्नमस्ता सुरामांसप्रिया रक्तस्वरूपिणी || २२ ||

धूमावती महाविद्या मारणोच्चाटने रता |

बगलावश्यस्तम्भादिनानागुणसमन्विता || २३ ||

मातङ्गी च महाविद्या त्रैलोक्यवशकारिणी |

जीवपुत्रैस्तु धनदा पाषाणैः सर्वभोगदा || २४ ||

कमला त्रिविधा प्रोक्ता एकाक्षरधिया स्थिता ||

केवला तु महासम्पद्दायिनी सुखमोक्षदा || २५ ||

|| इति द्वितीये मुण्डमालातन्त्रे प्रथमः पटलः || १ ||

अथ द्वितीयः पटलः

श्रीदेवी उवाच


अक्षमाला तु कथिता यत्नतो न प्रकाशिता |

अक्षमालेति किं नाम फलं किं वा वदस्वमे || १ ||


श्री-ईश्वर उवाच


अक्षमाला तु देवेशि  काम्यभेदादनेकधा |

भवन्ति शृणु तत् प्रौढे  विस्तारादुच्यते मया || २ ||

अनुलोमविलोमस्थक्षिप्तया वर्णमालया |

आदिनान्तःक्षादिकान्तःक्रमेण परमेश्वरि  || ३ ||

क्षकारं मेरुरूपं तं लङ्घयेन्न कदाचन |

मेरुहीना च या माला मेरुलङ्घ्या च या भवेत् || ४ ||

अशुद्धाऽतिप्रकाशा च सा माला निष्फलो भवेत् |

चित्राणी विशतन्त्वाभा ब्रह्मनाडीगतान्तरा || ५ ||

तया संग्रथिता ध्येया सर्वकामफलप्रदा |

अष्टोत्तरशतजपादादौ क्लीबं समाचरेत् || ६ ||

ऋऌवर्णद्वयं यत् तु तद्धिक्लीबं प्रचक्षते |

वर्गाणामष्टभिर्वापि काम्यभेदक्रमेण तु || ७ ||

अकचटतपयशा इत्येवं चाष्टवर्गतः |

स्फाटिकैर्मोक्षदा प्रोक्ता पद्माक्षैर्बहुपुत्रदा || ८ ||

शुद्धस्फटिकमाला तु महासम्पत्प्रदा प्रिये  |

श्मशानधूस्तुरैर्माला चैका धूमावतीविधौ || ९ ||

नराङ्गुल्यस्थिभिर्माला ग्रथिता पर्वभेदतः |

सर्वसिद्धप्रदा मोक्षदायिनी वरवर्णिनि  || १० ||

नाड्या संग्रथनं कार्यं रक्तेन वाससा अपि |

सदा गोप्यं प्रयत्नेन मातुश्च जारवत् प्रिये  || ११ ||

पञ्चधा कथिता माला सर्वसिद्धिफलप्रदा |

मौक्तिकैर्ग्रथिता माला सर्वैश्वर्यफलप्रदा || १२ ||

मणिरत्नप्रबालैश्च हेमराजतसम्भवा |

माला कार्या कुशग्रन्थ्या सर्वयज्ञफलप्रदा || १३ ||

नाडीभिर्ग्रथिता माला महासिद्धिप्रदा प्रिये  |

त्रिंशतैश्वर्यफलदा पञ्चविंशेन मोक्षदा || १४ ||

चतुर्दशमयी मोक्षदायिनी भोगवर्ध्हिनी |

पञ्चदशात्मिका देवि  मारणोच्चाटने स्थिता || १५ ||

स्तम्भने मोहने वश्ये तिरोधानेऽञ्जने तनोः |

पादुकासिद्धिसङ्घे च शतं सङ्ख्या प्रकीर्तिता || १६ ||

अष्टोत्तरशतं कुर्यादथवा सर्वकामदम् |

नित्यं जपं करे कुर्यान्न तु काम्यं कदाचन || १७ ||

काम्यमपि करे कुर्यान्मालाभावे प्रियंवदे |

तत्राङ्गुलिजपं कुर्वन् साङ्गुष्ठाङ्गुलिभिर्जपेत् || १८ ||

अङ्गुष्ठेन विना कर्मकृतं तदफलं भवेत् |

अनामिकाद्वयं पर्व कनिष्ठादिक्रमेण तु || १९ ||

तर्जनीमूलपर्यन्तं करमाला प्रकीर्तिता |

मेरुं प्रदक्षिणीकुर्वन् अनामामूलपर्वतः || २० ||

मेरुलङ्घनदोषात् तु अन्यथा जायते फलम् |

आरभ्याऽनामिकामूलात् प्रादक्षिण्यक्रमेण तु || २१ ||

मध्यमामूलपर्यन्तं जपेदष्टसु पर्वसु |

तर्जनीमूलपर्यन्तं जपेद् दशसु पर्वसु || २२ ||

मध्यमा त्रितया ग्राह्या अनामामूलमेव च |

अनामामध्यपर्वं तु मेरुं कृत्वा न लङ्घयेत् || २३ ||

तर्जन्यग्रे तथा मध्ये यो जपेत् तत्र मानवः |

चत्वारि तस्य नश्यन्ति आयुर्विद्या यशो बलम् || २४ ||

अङ्गुलीर्न वियुञ्जीत् किञ्चित् सङ्कोचयेत् तलम् |

अथातः प्रथमं वक्ष्ये मालानां तन्त्रबोधनम् || २५ ||

पूजां विधाय भक्त्या तु शुचिः पूर्वमुपोषितः |

विजने प्रजपेन्मौनी स्वयं मालां च साधकः || २६ ||

कृतनित्यक्रियः शुद्धः शुद्धक्षणे च मन्त्रवित् |

यथाकालं यथालाभमक्षाण्यानीय यत्नतः || २७ ||

अन्योन्यसमरूपाणि नातिस्थूलकृशानि च |

कीटादिभिरदुष्टानि न जीर्णानि नवानि च || २८ ||

गव्यैस्तु पञ्चभिस्तानि प्रक्षाल्य च पृथक् पृथक् |

ततो द्विजेन्द्रपुण्यस्त्रीनिर्मितं ग्रन्थिवर्जितम् || २९ ||

त्रिगुणं त्रिगुणीकृत्य पट्टसूत्रमथापि वा |

शुक्लं रक्तं तथा कृष्णं शान्तिवश्याभिचारके || ३० ||

अश्वत्थपत्रैर्नवकैः पद्माकारेण स्थापितैः |

सूत्रं मणींश्च गन्धान्तैः क्षालितास्तत्र निक्षिपेत् || ३१ ||

श्मशानवारिणा चापि पीठप्रक्षालितेन च |

शुद्धोदकेन रत्नेन कस्तूरीकुङ्कुमेन च || ३२ ||

तावत् शक्तिं मातृकां च सूत्रे चैव मणिष्वथ |

विन्यस्य पूजयेदाज्यैर्जुहुयाच्चैव यत्नतः || ३३ ||

होमकर्मण्यशक्तश्चेद् द्विगुणं जपमाचरेत् |

मणिमेकैकमादाय सूत्रे सम्पातयेत् सुधीः || ३४ ||

मुखे मुखं तु संयुज्य पुच्छे पुच्छं तु योजयेत् |

गोपुच्छसदृशी कार्याऽथवा सर्पाकृतिर्भवेत् || ३५ ||

तत्सजातीयमेकाक्षं मेरुत्वेनाऽग्रतो न्यस्त् |

एकैकमणिमध्ये तु ब्रह्मग्रन्थिं प्रकल्पयेत् || ३६ ||

जपमालां विधायेत्थं ततः संस्कारमारभेत् |

क्षालयेत् पञ्चगव्येन सद्योजातेन तज्जलैः || ३७ ||


मन्त्रस्तु -


ओं सद्योजातं प्रपद्यामि सद्योजाताय वै नमः |

भवे भवे नाभिभवे भव एव मां भवोद्भवः ||

भवे भवस्य मां भवोद्भवः || ३८ ||

ङेन्तान्तः प्रणवाद्येन नमोऽन्तेन क्रमाद् यजेत् |

चन्दनागुरुगन्धाद्यैर्वामदेवेन घर्षयेत् || ३९ ||

ओं नमो वामादेवाय नमो ज्येष्ठाय

नमः श्रेष्ठाय नमो रुद्राय नमः |

कालाय नमः कलविकरणाय नमो

बलविकरणाय नमः प्रमथनाय नमः ||

सर्वभूतदमनाय नमो

नम उन्मत्ताय उन्मनाय नमो नमः || ४० ||

धूपयेत् तामघोरेण लेपयेत् पुरुषेण वै |

ओं घोरेभ्योऽघोरेभ्यो घोरघोरतरेभ्यः || ४१ ||

सर्वतः सर्वसर्वेभ्यो नमस्तेऽस्तु रुद्रेभ्यः |

ओं तत्पुरुषाय विद्महे महादेवाय धीमहि || ४२ ||

तन्नो रुद्रः प्रचोदयात् |

मन्त्रयेत् पञ्चमेनैव प्रत्येकं तु शतं शतम् || ४३ ||

ओं ईशानः सर्वविद्यानांमीश्वरः सर्वभूतानाम् |

ब्रह्मणोऽधिपतिर्ब्रह्मणोऽधिपतिः शिवः पञ्च सदाशिवः || ४४ ||

प्रणवाद्यो महामन्त्रः सदाशिव इति क्रमात् |

मेरुं च पञ्चमेनैव ततो मन्त्रेण मन्त्रयेत् || ४५ ||

संस्कृत्यैवं बुधो मालां तत्प्राणांस्तत्र स्थापयेत् |

मूलमन्त्रेण देवेशि  सम्पूज्य भक्तिभावतः || ४६ ||

गुरुं सम्पूज्य तद्धस्तात् गृह्णीयादक्षमालिकाम् |

अशुचिर्न स्पृशेदेनां करभ्रष्टां न कारयेत् || ४७ ||

अङ्गुष्ठस्थामक्षमालां चालयेन्मध्यमाग्रतः |

तर्जन्यां न स्पृशेदेनां गुरोरपि न दर्शयेत् || ४८ ||

मध्यमाद् भुक्तिमुक्तिः स्यादनामादुत्तमेन तु |

तर्जनीमारणादिष्टकनिष्ठामारणं स्मृतम् || ४९ ||

भुक्तौ मुक्तौ तथा कृष्टौ मध्यमायां जपे सुधीः |

अङ्गुष्ठानामिकाभ्यान्तु जपेद् वश्ये तु कर्मणि || ५० ||

तर्जन्यङ्गुष्ठयोगेन मारणोच्चाटने जपेत् |

कनिष्ठाङ्गुष्ठयोगाच्च जपेन्मारणकर्मणि || ५१ ||

जपान्ते तु च मालां वै पूजयित्वा तु पोषयेत् |

जपकाले तु गोप्तव्या जपमाला तु सा शुभा || ५२ ||

गुरुं प्रकाशयेद् विद्वान् न तु मन्त्रं कदाचन |

अक्षमालां च विद्यां च न कदाचित् प्रकाशयेत् || ५३ ||

भूतराक्षसवेताला गन्धर्वाः सिद्धचारणाः |

हरन्ति प्रकटात् सिद्धिं तस्माद् गुप्तिं सदा कुरु || ५४ ||

जीर्णसूत्रे पुनः सूत्रं ग्रथयित्वा शतं जपेत् |

प्रमादात् पतिताद्धस्तात् शतमष्टोत्तरं जपेत् || ५५ ||

भ्रमन्निषिद्धसंस्पर्शे क्षालयित्वा च पूजयेत् |

जपमाला मया देवि  कथिता भुवि दुर्लभा ||

सदा गोप्या प्रयत्नेन यदि त्वं मम वल्लभा || ५६ ||

|| इति द्वितीये मुण्डमालातन्त्रे द्वितीयः पटलः || २ ||

अथ तृतीयः पटलः


देवी उवाच


स्थानासने देवदेव  कथयानन्दसुन्दर  |

सदाचार्यं विना येन सर्वमन्त्राः सुसिद्धगाः || १ ||


श्री-ईश्वर उवाच


नदीतीरे बिल्वमूले श्मशाने शून्यवेश्मनि |

महालिङ्गे पर्वते वा देवागारे चतुष्पथे || २ ||

शवस्योपरि मुण्डे वा जले वा कण्ठपूरिते |

संग्रामभूमौ योनौ तु स्थले वा विजने वने || ३ ||

यत्र कुत्र स्थले रम्ये यत्र वा स्यान्मनोरमम् |

स्थानं ते कथितं देवि  आसनं कथ्यतेऽधुना || ४ ||

स्तम्भने गजचर्माऽथ मारणे माहिषं तथा |

मेषचर्म तथोच्चाटे खड्गीयं वश्यकर्मणि || ५ ||

विद्वेषे जाम्बुकं प्रोक्तं भवेद् गोचर्म शन्तिके |

व्याघ्राजिने सर्वसिद्धिर्ज्ञानसिद्धिर्मृगाजिने || ६ ||

वस्त्रासनं रोगहरं वेत्रजं विपुलश्रियम् |

कौशेयं पुष्टिकार्ये च कम्बलं दुःखमोचनम् ||

रक्तं वा यदि वा कृष्णं विशेषाद् रक्तकम्बलम् || ७ ||


निन्दितासनमाह -


वंशासने च दारिद्र्यं दौर्भाग्यं दारुजासने |

धरण्यां दुःखसम्भूतिः पाषाणे रोगसम्भवः || ८ ||

तृष्णासने यशोहानिरेतत् साधारणं स्मृतम् |

मृदुकम्बलमास्तीर्णं संग्रामे पतितं हि तत् || ९ ||

जन्तुव्यापादितं वाऽपि मृतं वा नवमासकम् |

गर्भच्युतत्वचं वापि नारीणां योनिजां त्वचम् || १० ||

सर्वसिद्धिप्रदं देवि  सर्वभोगसमृद्धिदम् |

त्वचं वा योनिसंस्थायाः कुर्याद् वीरो रतासनम् || ११ ||

श्मशानकाष्ठघटितं पीठं वा यज्ञदारुजम् |

नाऽदीक्षितो विशेज्जातु कृष्णसारासने गृही || १२ ||

उदासीनवदासीनस्नातकब्रह्मचारिणः |

कुशाजिनाम्बरैः कार्यं चतुरस्रं समन्तन्तः || १३ ||

एकहस्तं द्विहस्तं वा चतुरङ्गुलमुच्छ्रितम् |

विशुद्ध आसने कुर्यात् संस्कारं पूजनं बुधः || १४ ||

भद्रासनं रोगहरं योगदं कौर्ममासनम् |

पद्मासनमिति प्राहुः सर्वैश्वर्यफलप्रदम् || १५ ||

एकं वीरासनं देवि  सर्वसिद्धिप्रदं नृणाम् |

ऊर्ध्वपादौ स्थितौ देवि  निरोधः परिमण्डितम् || १६ ||

पद्मासनेन देवेशि  पातालगृहसंस्थितः |

सर्वासनानां श्रेष्ठं हि देवैरपि सुदुष्करम् || १७ ||

रात्रौ च योऽर्चयेद् देवीं धनवान् सुतवान् भवेत् |

पीठानां देवि  सर्वेषां चतुर्द्धा पीठमुत्तमम् || १८ ||

उड्डीयानं महापीठं पीठानां पीठमुत्तमम् |

जालन्धरं महापीठं तथा पूर्णाचलं मतम् || १९ ||

पञ्चाशत्पीठमध्ये तु कामरूपं महाफलं |

कृते जालन्धरं ज्ञेयं त्रेतायां पूर्णपर्वतम् || २० ||

उड्डीयानं द्वापरे च कामरूपं कलौ युगे |

महाफलप्रदं लोके तत्क्षणात् सिद्धिदं महत् || २१ ||

जपपूजा बलिस्तत्र देवि  लक्ष गुणो भवेत् |

बहुधा कथ्यते देवि  किं तस्य गुणवर्णनम् ||

योनिरूपेण यत्रास्ते स्वयं कोटिगुणात्मिका || २२ ||

|| इति द्वितीये मुण्डमालातन्त्रे तृतीयः पटलः ||

अथ चतुर्थः पटलः

श्रीदेवी उवाच


केवलं बलिदानेन तुष्टा भवति चण्डिका |

कथितं पूर्वमस्मभ्यं प्रकाशं कुरु शङ्कर  || १ ||


श्री-ईश्वर उवाच


अत्यन्तगुह्यं देवेशि  विधानं बलिपूजनम् |

कथयामि वरारोहे  सुस्थिरा भव सर्वदा || २ ||

दधि क्षीरं व्रतान्नं च पायसं शर्करान्वितम् |

पायसं क्षौद्रमांसं च नारिकेलं समोदकम् || ३ ||

शर्करं मेषखण्डं च आर्द्रकं सहशर्करम् |

रम्भाफलं लड्डुकं च भर्जितान्नं च पिष्टकम् || ४ ||

शालमत्स्यं च पाठीनं शकुलं चेकुटं तथा |

मद्गूरं च बलिं दद्यात् मांसं माहिषमेषकम् || ५ ||

पक्षिमांसं महादेवि  डिम्बं नानासमुद्भवम् |

कृष्णछागं महामांसं गोधिकां हरिणीं तथा || ६ ||

जलजे मत्स्यमांसे च गण्डकीमांसमेव च |

नानाव्यञ्जनदग्धानि व्यञ्जनानि मधूनि च || ७ ||

ईषद् दग्धं घृतेनाक्तं निशायां दिवसेऽपि वा |

बलिं दद्यात् विशेषेण कृष्णपक्षे शुभे दिने || ८ ||

छागे दत्ते भवेद् वाग्मी मेषे दत्ते कविर्भवेत् |

महिषे धनवृद्धिः स्यात् मृगे मोक्षफलं भवेत् || ९ ||

दत्ते पक्षिणि ऋद्धिः स्यात् गोधिकायां महाफलम् |

नरे दत्ते महर्द्धिः स्यात् यतः सिद्धिरनुत्तमा || १० ||

ललाट - हस्त - हृदय - शिरो - भ्रू - मध्यदेशतः |

स्वहृदो रुधिरे दत्ते रुद्रदेह इवाऽपरः || ११ ||

चण्डालबलिदानेन महासिद्धिः प्रजायते |

सुरादानेन देवेशि  महायोगीश्वरो भवेत् || १२ ||

सुरा तु त्रिविधा प्रोक्ता स्फाटिकी डाकिनी तथा |

काञ्चिकी च महादेवि  कथिता भुवि दुर्लभा || १३ ||

स्फाटिकीदानमात्रेण धनवृद्धिरनुत्तमा |

डाकिनीदानयोगेन सर्ववश्यो भवेद् ध्रुवम् || १४ ||

काञ्चिकी सुरया देवि  योऽर्चयेत् परमेश्वरीम् |

गुटिकाञ्जनस्तम्भादिमारणोच्चाटनादिभिः || १५ ||

महासिद्धीश्वरो भूत्वा वसेत् कल्पायुतं दिवि |

अर्घ्योदके महेशानि  महासिद्धिरनुत्तमा || १६ ||

रक्तचन्दनबिल्वादिजवाकुसुमवर्वरैः |

अर्घ्यं दत्त्वा महेशानि  सर्वकामार्थसाधनम् || १७ ||

सुरया चाऽर्घ्यदानेन योगिनीनां प्रियो भवेत् |

पुरः पात्रं घटस्याऽन्ते तदन्ते भोज्यपत्रकम् || १८ ||

तदन्ते वीरपात्रं च बलेः पात्रं तदन्तिके |

पाद्यार्घाचमनीयानां पात्राणि स्थापयेत् बुधः || १९ ||

महायोगी भवेद् देवि  पीठप्रक्षालितैर्जलैः |

स्वयम्भूकुसुमे दत्ते भवेत् षट्कर्मभाजनम् || २० ||

सुशीतलजलैरर्घ्यं कस्तूरीकुङ्कुमान्वितैः |

कुण्डगोलोऽथ बीजैर्वा सर्वसिद्धीश्वरो भवेत् || २१ ||

सधवारतिसम्भूतं कुण्डमुत्तमभूतिदम् |

विधवारतिसम्भूतं गोलमृद्धिप्रदं भुवि || २२ ||

मूलमन्त्रेण देविशि  आकृष्य निर्भयः शुचिः |

अर्घ्यं दद्यात् विशेषेण चक्रवातेन पूजिता || २३ ||

स्वयम्भूकुसुमं देवि  त्रिविधं भुवि जायते |

आषोडशादनूढाया उत्तमा सर्वसिद्धिदा || २४ ||

रजोयोगवशादन्या मध्यमा सुखदायिनी |

बलात्कारेण देवेशि  अधमा भोगवर्द्धिनी || २५ ||

कुमारीपूजने शक्तो नारीं स्वप्नेऽपि न स्मरेत् |

आकृष्य बद्धयोगेन गोलोऽथ पुष्पकं न्यसेत् || २६ ||

शुद्धं कुर्यात् प्रयत्नेन निर्भयः शुचिमानसः |

ताम्रपात्रे कपाले वा श्मशानकाष्ठनिर्मिते || २७ ||

शनिभौमदिने वाऽपि शरीरे मृतसम्भवे |

सुवर्णेऽप्यथ लोहे वा चक्रमर्च्यं यथाविधि || २८ ||

पुष्पाण्यपि तथा दद्याद् रक्तकृष्णसितानि च |

श्वेतरक्तं जवापुष्पं करवीरं तथा प्रिये  || २९ ||

तगरं मल्लिका जाती मालती यूथिका तथा |

धुत्तूराशोकबकुलाः श्वेतकृष्णाऽपराजिताः || ३० ||

बकपुष्पं बिल्वपत्रं चम्पकं नागकेशरम् |

वह्निका झिण्टिका कञ्चिरक्तं यत् परिकीर्तितम् || ३१ ||

अर्कपुष्पं जवापुष्पं वर्वरं च प्रियंवदे  |

अष्टम्यां तु विशेषेण सन्तुष्टा तस्य पार्वती || ३२ ||

अष्टम्यां च चतुर्दश्यां नानापुष्पैः समर्चयेत् |

पद्मपुष्पेण रक्तेन सन्तुष्टाः सर्वदेवताः || ३३ ||

कृष्णा वा यदि वा शुक्ला कालिका वरदा भवेत् |

श्मशानधुत्तरेणैव तुष्टा मधुमती परा || ३४ ||

श्मशानजातपुष्पेण सन्तुष्टा कालिका परा |

वन्यपुष्पैश्च विविधैः सन्तुष्टा पार्वती परा || ३५ ||

आमलक्यास्तु पत्रेण तुष्टा पुष्पेण पार्वती |

अष्टम्यां च चतुर्दश्यां नानापुष्पैः सदाऽर्चयेत् ||

श्मशाने रात्रिशेषे च शनिभौमदिने निशि || ३६ ||

|| इति द्वितीये मुण्डमालातन्त्रे चतुर्थः पटलः || ४ ||

अथ पञ्चमः पटलः


श्रीदेवी उवाच


रहस्यातिरहस्यं मे पुरश्चर्याविधिं प्रभो  |

वदस्व यदनुष्ठानात् सर्वकामा भवन्ति हि || १ ||


श्री-ईश्वर उवाच


गृहीत्वा सद्गुरोर्दीक्षां शुभकाले दिवा निशि |

अधमो वैष्णवः प्रोक्तो मध्यमः शैवदीक्षितः || २ ||

परया दीक्षितो यो वै स एव परमो गुरुः |

चतुर्दशसहस्राणि सेवितो हरिहरात्मकः || ३ ||

ततो भवति देवेशि  परापूजारतः पुमान् |

कायेन मनसा वाचा सुवर्णरजतादिभिः || ४ ||

सन्तोष्य परया भक्त्या गुरुं दीक्षां समाश्रयेत् |

पूर्वोक्तस्थानमासाद्य जपपूजां समाश्रयेत् || ५ ||

प्रातःकालं समारभ्य जपेन्मध्यदिनावधि |

प्रथमेऽहनि यज्जप्तं तज्जप्तव्यं दिने दिने || ६ ||

न्यूनाधिकं न जप्तव्यमासमाप्तं सदा जपेत् |

गते प्रथमयामे तु तृतीयप्रहरावधि || ७ ||

निशायां च प्रजप्तव्यं रात्रिशेषे जपेन्न च |

हविष्यं भक्षयेन्नित्यमेकवारं सुसंयतः || ८ ||

लघ्वाहारं प्रकुर्वीत युवतीपूजने रतः |

स्वस्त्रीमन्यस्त्रीयं वापि पूजयेत् सर्वपर्वसु || ९ ||

नाधमे सङ्गतिः कार्या सर्वप्राणिहिते रतः |

यस्य यावान् पजः प्रोक्तः तद्दशांशमनुक्रमात् || १० ||

तत्तद्द्रव्यैर्जपस्याऽन्ते होमं कुर्याद् दिने दिने |

होमस्य च दशांशेन तर्पणं प्रोक्तमेव च || ११ ||

तर्पणस्य दशांशेन शिरोमार्जनमिष्यते |

तद्दशांशेन विप्रेन्द्रान् कुर्वीत कुलकन्यकाः || १२ ||

सम्भोजयेत् प्रीतियुक्तैर्द्रव्यैर्नानाविधैरपि |

होमाद्यशक्तो देवेशि  कुर्याच्च द्विगुणं जपम् || १३ ||

यदि पूजाद्यशक्तः स्यात् द्रव्यालाभेन सुन्दरि  |

केवलं जपमात्रेण पुरश्चर्या विधीयते || १४ ||

दिव्यो वा यदि वा वीरो भुवि स्यात् साधकोत्तमः |

स्वेच्छाचारपरो भूत्वा एकान्ते सर्वदा जपेत् || १५ ||

मत्स्यमांसप्रदानेन शाक्तः कुर्यात् पुरस्क्रियाम् |

एकारात्रौ श्मशाने वा शवे वा प्रौढबालयोः || १६ ||

मयोक्तं भैरवीकल्पे विधानं वरवर्णिनि  |

हस्तमात्रनिखाते वा कुण्डे वा विजने वने || १७ ||

वीराणां साधनं देवि  कथितं भुवि दुष्करम् |

कुमारीपूजनादेव पुरश्चर्याविधिः स्मृतः || १८ ||

नानाजातिभवाः कन्या रूपलावण्यसंयुताः |

अत्यन्तप्रौढा बाला वा कोकिला वरदायिनी || १९ ||

नानाद्रव्यैः प्रियकरैः भक्ष्यभोज्यादिभिः शुभैः |

पूजयेत् परभावेन नानारूपमनोहराः || २० ||

भगिनी कन्यका वाऽपि दौहित्री वा कुटुम्बिनी |

मातृवर्जं सदा पूज्या नानाजातिसमुद्भवा || २१ ||

अथवाऽन्यप्रकारेण पुरश्चरणमिष्यते |

कृष्णां चतुर्दशीं प्राप्य नवम्यां तु महोत्सवे || २२ ||

सूर्योदयं समारभ्य यावत् सूर्योदयं भवेत् |

तावज्जप्ते महेशानि  पुरश्चर्या विधीयते || २३ ||

कृष्णाष्टमीं समारभ्य यावत् कृष्णाष्टमी भवेत् |

सहस्रसंख्ये जप्ते तु पुरश्चरणमिष्यते || २४ ||

अष्टमीं नवमीं रात्रौ पूजां कुर्यात् विशेषतः |

दशम्यां पारणं कुर्यात् मत्स्यमांसादिभिः प्रिये || २५ ||

षट्सहस्रं जपेन्नित्यं भक्तिभावपरायणः |

चतुर्दशीं समारभ्य यावदन्या चतुर्दशी || २६ ||

तावज्जपेत् महेशानि  पुरश्चरणमिष्यते |

केवलं जपमात्रेण मन्त्राः सिद्धा भवन्ति हि || २७ ||

विना होमादिदानेन विशेषात् पीठपूजने |

योनिपीठं महापीठं कामपीठं तथाऽपरम् || २८ ||

तयोरेकतरं पूज्यं रुद्रदेह इवापरः |

तीर्थे तिथिविशेषे च ग्रहणे चन्द्रसूर्ययोः ||

गुरोरनुग्रहे चैव दीक्षाकालः शुभः स्मृतः || २९ ||


|| इति द्वितीये मुण्डमालातन्त्रे पञ्चमः पटलः || ५ ||

अथ षष्ठः पटलः

अथ देवि  प्रवक्ष्यामि गुप्तां त्रिभुवनेश्वरीम् |

यामाराध्य पुरा सर्वे भूतिभाजोऽभवन् सुराः || १ ||

ब्रह्मा रुद्रः सहस्राक्षो रमाशिवमनोभवाः |

शक्तिर्माया महेशानि  विद्या वस्वक्षरा मता || २ ||

ऋषिर्ब्रह्मा विराट् छन्दो देवता लोकपावनी |

महामायेति विख्याता बीजं लक्ष्मीः प्रकीर्तितम् || ३ ||

माया शक्तिः कीलकं च शैवदेहमुदाहृतम् |

षडङ्गानि ततः कुर्यात् मायादीर्घेण संयुता || ४ ||

ध्यानं देवि  प्रवक्ष्यामि सर्वैश्वर्यफलप्रदम् |

विद्युत् पुञ्जनिभां देवीं रक्तपद्मासने स्थिताम् || ५ ||

त्रिनेत्रां दिग्भवावासां पाणिविंशतिशोभिताम् |

पीत - रक्त - श्वेत - कृष्ण - धूम्र - पाटल - मौक्तिकम् || ६ ||

नील - पीत - विचित्राणि वर्णानि कथितानि वै |

खङ्ग - शूल - गदा - चक्र - शङ्ख - चाप - शराणि च || ७ ||

लसत्परिघशस्त्राढ्यमूषलं दाननिर्भयम् |

कर्तृमुद्रां तथा योगमुद्रां च दधतीं करैः || ८ ||

शक्तिशूलधरां देवी सर्वसिद्धिफलप्रदाम् |

पूजायन्त्रं प्रवक्ष्यामि षट्कोणं शक्तिसंयुतम् || ९ ||

षडष्टषोडशदलं पद्मं द्वारसमन्वितम् |

त्रिकोणे पूजयेद् देवीं मायां वाणीं हरिप्रियाम् || १० ||

रतिः प्रीतिः क्षमा पूज्या पुष्टिस्तुतिमनोहराः |

योगनिद्रा महानिद्रा महामाया महासुरी || ११ ||

महामुद्रा महास्वप्ना षड्दले पूजयेत् क्रमात् |

क्षेमङ्करी योगमुद्रा शरीराकर्षिणी तथा || १२ ||

लज्जा शान्तिर्लक्षणा च चपला शान्तिविग्रहा |

अष्टदले महेशानि  वामावर्तेन पूजयेत् || १३ ||

विद्या च परमा विद्या महाविद्या महाबला |

सौम्या परमसौम्या च महासौम्या महापरा || १४ ||

कालरात्रिर्महारात्रिर्गायत्री च महाम्बिके  |

प्रकृतिर्विकृतिर्मेघा विश्वरूपाः क्रमादिमाः || १५ ||

महातत्त्वा प्रमत्ता च उन्मदा मन्दगामिनी |

महाप्रह्लादा बगला पूजयेद् विधिना तथा || १६ ||

जपमुण्डां महोग्रां च भीमाद् भीमकपालिकाम् |

अट्टाट्टहासिनीं नित्यां हर्षेणाऽविह्वलां तथा || १७ ||

विकटा बहुरूपा च महारूपा महाप्रदा |

घोररावा महानित्या महामञ्जुलभासिनी || १८ ||

सर्वदा सुन्दरी पूज्या अपरत्र क्रमात् प्रिये  |

इन्द्रादयस्ततः पूज्याः पूर्वादिदिग्विदिक्षु च || १९ ||

चतुर्द्वारे ततः पूज्या भगक्लिन्ना भगाक्षरा |

भगदेवी भगाक्षी च विधिना वामवर्त्मना || २० ||

एवं संपूज्य तां देवीं चतुर्लक्षं मनुं जपेत् |

होमादिविधिना कुर्यात् दशांशात् क्रमतः प्रिये  || २१ ||

अनया विद्यया देवि  महासिद्धीश्वरो भवेत् |

धनवान् पुत्रवान् वाग्मी सुधी भोगी महाबलः || २२ ||

राज्यलक्ष्मीमवाप्नोति देवीपुत्रः सदैव हि |

भुवनेशी भगवती वह्निजायान्वितो मनुः || २३ ||

सप्ताक्षरो महेशानि  सर्वसिद्धिफलप्रदः |

स्वर्णपद्मनिभां देवीं सर्वालङ्कारभूषिताम् || २४ ||

क्षौमवासां त्रिनयनां शैलसिंहसमाश्रिताम् |

अथवा सिंहशैलौ च इन्द्रादिरथदेवताः || २५ ||

एवं ध्यात्वा जपेत् पूर्वं समस्तं हि समाहितः |

सर्वकालं तु तज्जप्यं मन्त्रं सर्वसमृद्धिदम् || २६ ||

शिववामेन संयुक्तं श्रोत्रेन द्वितयं प्रिये  |

ब्रह्मामुखेन संयुक्तो द्विरावृत्तमनुक्रमात् || २७ ||

नयनेन समायुक्तः शक्रान्विततया गतः |

हृदायुक्तो मनुरयं सर्वविद्याफलप्रदः || २८ ||

बीजं शक्तिः कीलकं च आद्यन्तमध्ययोगतः |

षड्दीर्घबीजादेव षडङ्गानि प्रकल्पयेत् || २९ ||

कालीं करालवदनां नरमालाविभूषिताम् |

चतुर्हस्तां त्रिनयनां शशमांसकराम्बुजाम् || ३० ||

कपालचित्रखट्वाङ्गधारिणीं भीमनादिनीम् |

करिचर्मपरीधानां शुष्कमांसातिभैरवाम् || ३१ ||

त्रैलोक्यग्रसमानास्यां जिह्वाद्वितयभीषणाम् |

निमग्न - वर्तुलाऽऽरक्त - नयन - त्रय - धारिणीम् || ३२ ||

एवं ध्यावा यजेद् देवीं कुलपीठे मनोहरे |

त्रिकोणं चतुरस्रं तु षट्कोणं नवकोणकम् || ३३ ||

वृत्तं दलाष्टमथवा चतुरस्रं लिखेत् बुधः |

त्रिकोणे पूजयेद् देवीं प्रचण्डां चण्डनायिकाम् || ३४ ||

चण्डकालीं च चण्डालीं प्रचण्डां कालनायिकाम् |

खट्वां मत्तां क्रमाद् देवि  पूजयेद् विधिना पथा || ३५ ||

जयतुण्डां महोग्रीं च भीमां भीमकपालिकाम् |

अट्टाट्टहासिनीं नित्यां प्रगल्भां घोररूपिणीम् || ३६ ||

शुष्कभीमां जपेद् देवि  वसुकोणे परात्मिके |

अतिकालीं महाकालीं महानित्यां महाभयाम् || ३७ ||

विचित्रां चित्ररूपां च भीमनादनिनादिनीम् |

महाघोरां यजेद् देवि  दलान् दिक्षु विदिक्षु च || ३८ ||

इन्द्रादयस्ततः पूज्या लक्षमन्त्रं सदा जपेत् |

इयं सा षोडशी प्रोक्ता त्रिशक्तिरभिधीयते || ३९ ||

तारं कान्तं युवतिस्थं वारुणं भौतिकं तथा |

सेचनीये द्वयं कूर्चं फट् स्वाहा च तथा परे || ४० ||

वेदाद्याब्जवै (?) रोचनीये सर्वपदं तथा |

बुद्धिभावं तथाङीय रुद्रवत् परिकीर्तितम् || ४१ ||

वन्दनीयः शिवः षष्ठः स्वरमर्त्यसमन्विताम् |

नादबिन्दुयुतां द्वन्द्वं फट् स्वाहा तदनन्तरम् || ४२ ||

सप्तविंश[अक्षरयुता] महाविद्या प्रकीर्तिता |

ओं लज्जां त्रपां मेधां हुं फडित्युग्रतारिका || ४३ ||

ओं माया श्रीं हुं अस्त्रान्तमित्येकजटामन्त्रः |

रकारं प्रथमं रेफचतुर्दशस्वरान्वितम् || ४४ ||

पुटितान्तेन कर्तव्यं परापरफलप्रदम् |

अस्त्रहीनमिदं नीलसरस्वत्या विनिर्दिशेत् || ४५ ||

कामाख्यायास्तु ह्रां ह्रीं ह्रूं त्रिपुरं समुदाहृतम् |

नारसिंहस्ततः श्वन्तं शुद्धं कुर्यात्तमेव च || ४६ ||

ईं ईङ्कारिणीमाख्याता त्रिबीजं मन्त्रमुत्तमम् |

तुर्यमष्टोत्तरमथवा ? पुनरुत्तरम् || ४७ ||

इति भगवति वैष्णवीति पदं ततः |

सुभगे वह्निजायान्तं मन्त्रमेवं प्रकीर्तयेत् || ४८ ||

इन्द्रबीजं समुच्चार्य षष्ठस्वरसमन्वितम् |

वाराही शक्रबीजं च पञ्चस्वरविभूषितम् || ४९ ||

ओं तुष्यतु भैरवीपदं चरणाय नमोक्तिकम् |

वाराह्या इति विख्याता दुर्लभा शत्रुमारणे || ५० ||

ब्रह्मा वह्निसमारूढः चतुर्थस्वरसंयुतः |

नादबिन्दुसमायुक्तस्त्रिशूलीकृतविग्रहः || ५१ ||

कृच्छ्रं शिवायुग्मं नामाक्षरसमायुतम् |

वाग्बीजवह्निवनिता दक्षिणाया द्विविंशतिः || ५२ ||

ह्रीं स्वरत्रैपुरा केवलाया इहेत्यपि |

हन्ति पिशाचिनी चैव त्रिभाषां तदादितः || ५३ ||

उच्छिष्ठगणनाथस्य मन्त्रोऽयं सर्वदाकृतः |

एतासामपि देवीनां जषहोमे च तर्पणे || ५४ ||

स्वेच्छाविरचितं रत्ने तत्त्वबोधनिरोधने |

देवतागुरुमन्त्राणामैक्यमावश्यकारिणः || ५५ ||

श्रद्धया जायते सिद्धिरिह लोकेऽपरत्र च |

नित्यमध्यात्मयोगे च स्थिरात् सिद्धिमवाप्नुयात् || ५६ ||

सर्वान् कामानवाप्नोति दिव्यान् भोगान् रसातलान् |

शृणु देवि  प्रवक्ष्यामि म्हाविद्यां महाकलाम् || ५७ ||

नादबिन्दुसमायुक्तमाद्यबीजमुदाहृतम् |

वान्तनेत्रेण संयुक्तं पान्तेन सहितं प्रिये || ५८ ||

नादबिन्दुसमायुक्तं द्वितीयं बीजमुत्तमम् |

सर्वैश्वर्यप्रदे वह्निजायान्तो मनुरुत्तमः || ५९ ||

ऋषिः सदाशिवोऽस्यास्तु गायत्रीच्छन्द उच्यते |

देवता शुम्भमथनी सर्वदेवनमस्कृता || ६० ||

आद्यबीजेन देवेशि  षड् दीर्घेण षडङ्गकम् |

आद्यन्तबीजयोगेन बीजशक्तिशरीरकाम् || ६१ ||

ध्यायेद् देवीं त्रिनयनां फुल्लेन्दीवरलोचनाम् |

पक्वबिम्बसमानाङ्गीं चारुचन्द्रनिभाननाम् || ६२ ||

अष्टादशभुजां नित्यां सिंहपृष्ठसमाश्रिताम् |

कोटिकोटिगणैरर्च्या पाशाङ्कुशधनुःशरान् || ६३ ||

शङ्खचक्रगदापद्मघण्टामुद्गरपट्टिशान् |

चर्मखड्गं महायष्टिं कपालकर्कशान् शरान् || ६४ ||

अथवा पाणिशतशः प्रहारैरतिसंयुताम् |

त्रिकोणान्तरषट्कोणे दलाष्टपरिशोभिते || ६५ ||

पद्मे त्रिकोणमध्ये तु सिद्धर्धिककला लता |

षट्कोणे पूजयेद् देवीं कालीं चण्डां प्रचण्डिकाम् || ६६ ||

इच्छापूर्तिमहाभीमां शिवानीं वामवर्त्मना |

अथाऽष्टदलमध्ये तु ब्राह्यादिमातरः क्रमात् || ६७ ||

ब्राह्मी माहेश्वरी स्कान्दी वैष्णवी शांकरी तथा |

नारसिंही तथा चैन्द्री शिवदूती प्रभेदतः || ६८ ||

यथावर्णयथाशस्त्रधारिण्यो योगिनीगणाः |

इन्द्रादयस्ततः पूज्या द्वारे नन्दिमहाबलौ || ६९ ||

पराजयो जयश्चैव पुष्पाञ्जलित्रयैर्यजेत् |

पञ्चलक्षं जपेन्मन्त्रं तद्धोमादि दशांशतः || ७० ||

अनया सदृशी विद्या त्रिलोकेषु सुदुर्लभा |

केवलं त्वत्प्रयत्नेन कथिता कुलसुन्दरि  || ७१ ||

क्रमात् विद्या महेशानि  समस्तायां हि पूजयेत् |

न किञ्चित् दुर्लभं तस्य त्रिषु लोकेषु विद्यते || ७२ ||

इह लोके सुखं सर्वं देवीगणमथाऽन्यतः |

गोप्तव्यं तत् प्रयत्नेन यस्मै कस्मै न विन्यसेत् || ७३ ||

|| इति द्वितीये मुण्डमालातन्त्रे षष्ठः पटलः || ६ ||

समाप्तश्चायं ग्रन्थः





###########   END OF FILE  #######